تأملات عراقية

صبرنا وحد صبرنه فاض للهامة
وجزعنه من الفقر ونياح اليتامه
************************
يمر بينه العمر وايامه تمشي وياه
خلصناه ويلاه اعله فد ويلاه
مو ضاكت يربي ومايفيد الاه
ولاينفع النوم وتنفع احلامه
********************************
جبناهه بعذاب وهم يلحكه بهم
وجرعنه من الزغر وشبعنه كوس السم
عجب يرضيك ياربي مسيل الدم
وعجب يبقه وطنه مجتّف سيامه
********************************
صدك نرجع بلدنه ونترك الغربه
واليجّتّف يصلي ويه ابو التربه
صدك يرجع عدل لمتيّهه الدربه
وصدك للشط بعد هم ترجع بلامه
***********************************
صدك ناكل صفر ونعوف النخاله
صدك نلبس جديد ونترك الباله
صدك ترجع العمه وترجع الخاله
وصدك منشوف بالشارع ولاعمامه
**********************
صدك نرجع شباب ومانشوف الشيب
وصدك يرجع شغلنه وينترس هالجيب
صدك يدخل عراقي الاردن بترحيب
وصدك يرجع بليل الصيف وينامه
*******************************
صدك ماكو قذايف لاولا عبوات
وصدك بارض اللطيفيه نروح نبات
وصدك ماكو عدو بينه ولاشمّات
ولابينه الافغاني يفجّر حزامه
*************************
صدك تغسل الدم سيارة الاسعاف
وصدك يطلع طفلنه بوحّده وميخاف
وصدك يحكم بلدنه اليعرف الاعراف
واللغاف يطلع هو وازلامه
******************************
بعد شتريد ياسامع وتتأمل
التريده وتطلبه يكولولك اتفضل
وبعد ماكو صبر مو كافي نتحمل
مو حتى الصبر متنعنعه عظامه
***********************************




طبعا هذي الكلمات منقولة من احد الاصدقاء ......